0

Некалькі фактаў зь гісторыі беларускіх дранікаў (Відэарэцэпт)

Праглядаў: 916
Дранікі — візытоўка нацыянальнае кухні Беларусі ды, бессумненна, чаканы госьць на стале кожнае беларускае сям’і. Першая гістарычная згадка пра дранікі датуецца 1830 годам, калі знакаміты на былых землях ВКЛ кулінар Ян Шытлер упісаў рэцэпт «Blinki kartoflane» ў адную са сваіх кулінарных кнігаў — «Кухар добра навучаны» («Kucharz dobrze usposobiony»). Прыйшлі да нас дранікі зь нямецкае кухні ды, наколькі вядома, не без пасярэдніцтва беларускіх жыдоў.

Некалькі фактаў зь гісторыі беларускіх дранікаў (Відэарэцэпт)

Ні для каго не сакрэт, што сваю назву дранікі атрымалі ня йнакш як ад слова «дзерці», бо бульбу для гэтае стравы не таркуюць, а менавіта дзяруць на адмысловай калючкавай тарцы. Тарак, звыклых у нашым разуменьні, у тыя часы яшчэ не было, таму, замест іх, выкарыстоўваліся драўляныя дошкі з рабрыстаю паверхняю (як дошкі для праньня) ці мэталічныя лісты з прабітымі адтулінамі.

Некалькі фактаў зь гісторыі беларускіх дранікаў (Відэарэцэпт)

Для прыгатаваньня сапраўдных беларускіх дранікаў спатрэбяцца толькі натаркаваная бульба ды соль. Не сьпяшаецеся ўбіваць у атрыманую масу муку ці яйкі, бо тут элемэнт, які змацоўвае, — крухмал, які, апроч таго, робіць бліны храбусткімі звонку ды цягучымі ўнутры. Дарэчы, на думку шмат каго з кулінарных экспэртаў, пры даданьні мукі дранікі й зусім губляюць свой выключны смак і ператвараюцца ў звычайныя бульбяныя аладкі. У страву можна дадаваць цыбулю, часнык, моркву й нават сыраквашу, а неяк разнастаіць яе дапамогуць усялякія начыньні з фаршу, грыбоў ці тварагу, да прыкладу.

Спрадвечна дранікі смажыліся на сьвіным тлушчы, сёньня ж часьцей выкарыстоўваюць алей ці сьметанковае масла. Дранікі, абсмажаныя да залацістае скарыначкі з абодвух бакоў, або падаюць гарачымі на стол (са сьмятанаю, маслам, мачанкаю), або запякаюць у гаршчку з салам, цыбуляю, грыбамі.

Беларускія дранікі маюць «сваякоў» па ўсім сьвеце:
— украінскія дэруны / тэрцюхі / крэмзлыкі (деруни / тертюхи / кремзлики);
— польскія пляцкі (placki ziemniaczane);
— ізраільскія латкес (latkes, לביבות);
— нямецкія картофэльпуфэры (kartoffelpuffer);
— чэскія брамбаракі (bramboráky);
— швайцарскія рэшці (rösti);
— швэдзкія раґмункі (raggmunk);
— амэрыканскія гэш-браўны ці патэйтаў-пэнкейкі (hash browns, potato pancakes).

На 2-4 порцыі клясычных беларускіх дранікаў трэба:


  • 1 кг бульбы;
  • 2-4 лыжкі сьвінога тлушчу;
  • 0,5 цыбуліны;
  • соль на смак.

Бульбу памыць, абабраць разам з цыбуляю. Бульбіну, а потым і цыбулю натаркаваць у міску на дробнай калючкавай тарцы, перамяшаць. Натаркаваць усю астатнюю бульбу, шторазу дадаючы й зьмешваючы сьвежанатаркаваную масу з бульбяна-цыбульнаю сумесьсю. Пасаліць, добра перамяшаць, уліць пару лыжак вады, каб атрымаць храбусткія краі. Смажыць на сярэдне-моцным агні ў сьвіным тлушчы, выкладваючы ў патэльню па 1 лыжцы бульбяное сумесі. Гатаваць да залацістага колеру з кожнага боку. Падаваць гарачымі са сьмятанаю, сьвінымі скваркамі ці селядцоваю паляндвіцаю.



Паводле матэрыялаў: talerka.tv

Аўтарка: Jauhienka

Выявілі памылку ці "мёртвую" спасылку?

Вылучыце праблемны фрагмэнт мышкаю й націсьніце CTRL+ENTER.
У вакне, што зьявілася, апішыце праблему й адпраўце Адміністрацыі рэсурсу.

Камэнтары:0

ДАДАЦЬ КАМЭНТАР

Увядзіце код:*
абнавіць, калі ня бачны код